Friday, August 5, 2016

តើការរកស៊ីផ្លូវភេទគួរតែស្របច្បាប់ដែរឬទេ?



ការ រក ស៊ី ផ្លូវ ភេទ ត្រូវ បាន គេ ចាត់ ទុក ថា ជា ការងារ ដែល មាន អាយុ កាល ចំណាស់ ជាង គេ ក្នុង ពិភពលោក។ ទោះ ជា យ៉ាង នេះ ក៏ ដោយ ក៏ មនុស្ស ភាគ ច្រើន នៅ តែ មើល ងាយ ស្រ្តី (ឬ បុរស) ដែល រក ស៊ី ផ្លូវ ភេទ ហើយ គិត ថា ការងារ នេះ ជា ការងារ ដែល ថោក ទាប និង កង្វក់។ ប៉ុន្តែ ពេល ដែល យើង គិត មក វិញ តើ ការ រក ស៊ី ផ្លូវ ភេទ ខុស ពីការងារ ផ្សេង ទៀត ត្រង់ ណា?


ការងារ ទាំង អស់ គឺ សុទ្ធ តែ ទាម ទារ ឲ្យ យើង «លក់» ផ្នែក ណា មួយ នៃ រាង កាយ របស់ យើង។ ការ លក់ ភេទ និង ការ លក់ កម្លាំង ពលកម្ម គឺ សុទ្ធ តែ «លក់ ខ្លួន» ដូច គ្នា ទេ។ (តែ​បើ​និយាយ​ឲ្យ​ច្បាស់​ទៅ គឺ​ត្រឹម​តែ​ជួល​ខ្លួន​ទេ។ ពួក​គាត់​មិន​មែន​លក់​ខ្លួន​ធ្វើ​ទាសករ​ឲ្យ​ភ្ញៀវ​ទេ។) អ្នក​ចម្រៀង​លក់​សម្លេង និង​បំពង់​ក។ អ្នក​សម្តែង​លក់​ទឹក​មុខ និង​សម្រស់។ អ្នក​ធ្វើ​ការ​នៅ​ការិយាល័យ​លក់​ខួរ​ក្បាល។ អ្នក​រក​ស៊ី​ផ្លូវ​ភេទ​លក់​ជំនាញ និង​សម្រស់​របស់​ពួក​គាត់។ ប្រសិន​បើ​មិន​មាន​ជំនាញ​ក្នុង​ការ​រួមភេទ តើ​អ្នក​រក​ស៊ី​ផ្លូវ​ភេទ​ម្នាក់​អាច​រក​ស៊ី​បាន​ប៉ុន្មាន?

Credit: hellenicinsider.com
អ្វី​ដែល​ធ្វើ​ឲ្យ​មនុស្ស​ភាគ​ច្រើន​ស្អប់​ខ្ពើ់ម​មុខ​ងារ​នេះ គឺ​ដោយ​សារ​តែ​ពួក​គាត់​ប្រើប្រាស់​ប្រដាប់​ភេទ​របស់​ពួក​គាត់។ តើ​ប្រដាប់​ភេទ​ខុស​ពី​ផ្នែក​ផ្សេងៗ​ទៀត​របស់​ខ្លួន​មនុស្ស​ម្នាក់​ត្រង់​ណា? ផ្នែក​ណា​មួយ​នៃ​ខ្លួន​មនុស្ស​សុទ្ធ​តែ​មាន​មុខ​ងារ​ផ្សេងៗ ហើយ​ប្រដាប់​ភេទ​ក៏​មាន​មុខ​ងារ​សម្រាប់​រួមភេទ និង​បង្កើត​កូន។ តើ​មាន​រឿង​អ្វី​ត្រូវ​ស្អប់​ខ្ពើម? ឬ​មួយ​ក៏​ដោយ​សារ​តែ​វប្បធម៌​របស់​យើង​ណែនាំ​ថា ប្រដាប់​ភេទ គឺ​ជា​រឿង​សម្ងាត់ រឿង​កង្វក់​ដែល​គួរ​តែ​បិត​បាំង? ម៉េច​បាន​ជា​វប្បធម៌ និង​សង្គម​ចេះ​តែ​បង្រៀន​មនុស្ស​ឲ្យ​មើល​ងាយ​អ្នក​ដែល​ប្រើប្រាស់​ប្រដាប់​ភេទ​របស់​ខ្លួន​គេ​បែប​នេះ?

ខ្ញុំ ក៏​ដូច​ជា​ប្រទេស​មួយ​ចំនួន​ដូច​ជា Finland, France, Italy, Panama, Canada និង New Zealand យល់​ថា ការ​រក​ស៊ី​ផ្លូវ​ភេទ គួរ​តែ​ស្រប​ច្បាប់។ ប្រទេស​ខ្មែរ​យើង​ទើប​តែ​ដាក់​ច្បាប់​ឲ្យ​ការ​រក​ស៊ី​ផ្លូវ​ភេទ​ខុស​ច្បាប់​ប៉ុន្មាន​ឆ្នាំ​ក្រោយ​នេះ​ទេ។ ប៉ុន្តែ​ការ​ដាក់​ឲ្យ​ខុស​ច្បាប់​នេះ គឺ​មាន​ផល​វិបាក​ច្រើន​ណាស់​សម្រាប់​អ្នក​ដែល​រក​ស៊ី​ផ្លូវ​ភេទ។

ខ្ញុំ​ធ្លាប់​បាន​ស្តាប់​ការ​សម្ភាសន៍​របស់​អ្នក​រក​ស៊ី​ផ្លូវ​ភេទ​ជា​ច្រើន ដោយ​ពួក​គាត់​បាន​ប្រាប់​ថា ពេល​ខ្លះ​ពួក​គាត់​ត្រូវ​រត់​គេច​ពី​ប៉ូលីស ហើយ​ពេល​ខ្លះ ពេល​ដែល​ប៉ូលីស​ចាប់​គាត់​ ប៉ូលីស​ថែម​ទាំង​រំលោភ​គាត់​ទៀត។ ហើយ​គាត់​ធ្វើ​អ្វី​មិន​បាន​ទេ។ តើ​ឲ្យ​ពួក​គាត់​ទៅ​ប្តឹង​អ្នក​ណា បើ​ការងារ​របស់​គាត់​ខុស​ច្បាប់។ ប្រសិន​បើ​ការ​រក​ស៊ី​ផ្លូវ​ភេទ​ស្រប​ច្បាប់ ពួក​គាត់​អាច​យក​ករណី​នេះ​ទៅ​ប្តឹង​បន្ត ឬ​យ៉ាង​ហោច​ណាស់ ក៏​ប៉ូលីស​មិន​ទៅ​រំលោភ​គាត់​ទាំង​ស្រស់ៗ​ដែរ។

Credit: onmogul.com
ប្រសិន​បើ​ការ​រក​ស៊ី​ផ្លូវ​ភេទ​ស្រប​ច្បាប់ ពួក​គាត់​ច្បាស់​ជា​មាន​សិទ្ធិ​ការងារ ហើយ​មេ​ខ្យល់​របស់​គាត់ ក៏​មិន​អាច​រំលោភ​បំពាន​គាត់​បាន​ទេ។ ពួក​គាត់​អាច​មាន​សិទ្ធិ​ទទួល​ការ​ថែទាំ​សុខភាព អាច​ទៅ​ពិនិត្យ​សុខភាព និង​ការពារ​ជំងឺ​ឆ្លង​ដោយ​ពុំ​បាច់​ខ្មាស់​អៀន។ ការ​លក់​ភេទ​នឹង​មិន​នៅ​ក្នុង​ទីផ្សារ​ងងឹត​ដូច​ពេល​នេះ ហើយ​ការ​ជួញ​ដូរ​មនុស្ស​ ក៏​ប្រហែល​ជា​អាច​ថយ​ចុះ​ដែរ។ មិន​ត្រឹម​តែ​ប៉ុណ្ណឹង​ទេ រដ្ឋ​ក៏​អាច​បាន​ផល​ប្រយោជន៍​ដែរ ព្រោះ​ពួក​គាត់​ត្រូវ​បង់​ពន្ធ​ដូច​មនុស្ស​ធម្មតា។

ប្រសិន​បើ​មនុស្ស​ពេញ​វ័យ​២​នាក់​យល់​ព្រម​រួម​ភេទ​ដោយ​មាន​ការ​ដោះ​ដូរ​ប្រាក់ នេះ​គឺ​ជា​រឿង​របស់​មនុស្ស​២​នាក់​នោះ មិន​មាន​អ្វី​ដែល​ត្រូវ​ខុស​នោះ​ទេ។ ការងារ​របស់​គាត់​ គឺ​មិន​មាន​ប៉ះពាល់​ដល់​សិទ្ធិ​អ្នក​ណា​ម្នាក់​នោះ​ឡើយ។ ប្រសិន​បើ​យើង​មិន​ពេញ​ចិត្ត មិន​ចង់​ឃើញ និង​មិន​ចង់​ធ្វើ​ជា​អ្នក​រក​ស៊ី​ផ្លូវ​ភេទ កុំ​ធ្វើ​ កុំ​ទៅ​រក​សេវា​ពី​ពួក​គាត់​ទៅ​បាន​ហើយ។ តើ​មាន​អ្នក​ណា​មក​បង្ខំ? ចាំា​បាច់​មើល​ងាយ​គេ​ធ្វើ​អ្វី?

អ្នក​ដែល​កំពុង​តែ​អាន​នេះ ប្រហែល​ជា​ប្រកែក​ថា ប៉ុន្តែ​ការ​លក់​ភេទ​ខុស​ពី​វប្បធម៌​យើង បើ​បើក​ឲ្យ​សេរី ច្បាស់​ជា​បំផ្លាញ​វប្បធម៌​យើង​ហើយ។ តើ​ខុស​វប្បធម៌​ត្រង់​ណា? ខ្មែរ​យើង ជំនាន់​ណា​ក៏​មាន​អ្នក​លក់​ភេទ​ដែរ។ បើ​បំផ្លាញ​វប្បធម៌ គឺ​វប្បធម៌​ខ្ទេច​តាំង​ពី​រាប់​ពាន់​ឆ្នាំ​មុន​ហើយ។ កាល​ពី​សម័យ​ក្រិច និងរ៉ូម ក៏​មាន​ការ​លក់​ភេទ​ខ្លាំង​ដែរ។ តើ​បើ​យើង​មើល​វប្បធម៌​គេ វា​មិន​ត្រឹម​តែ​សម្បូរ​បែប​ទេ តែ​វា​ស្ថិត​ក្នុង​ចំណោម​វប្បធម៌​ដែល​ចំណាស់ និង​មាន​ឥទ្ធិពល​ជាង​គេ​ក្នុង​លោក។
គ្រាន់​តែ​រួម​ភេទ​ហើយ​បាន​លុយ​មក​វិញ បំផ្លាញ​វប្បធម៌​ដែរ? ម៉្យាង ឥឡូវ​មនុស្ស​ចេះ​ដឹង​ជាង​មុន​ច្រើន​ហើយ គួរ​តែ​ដឹង​ហើយ​ថា មិន​មែន​គ្រប់​ចំណុច​ក្នុង​វប្បធម៌​សុទ្ធ​តែ​បម្រើ​ផល​ប្រយោជន៍​មនុស្ស​ទេ។

អ្នក​ខ្លះ​និយាយ​ថា បើ​បើក​ឲ្យ​សេរី ម្នាក់ៗ​ច្បាស់​ជា​ទៅ​លក់​ភេទ​អស់​ហើយ។ តើ​ឥឡូវ​នេះ មិន​មាន​អ្នក​លក់​ភេទ​ឬ? ខុស​ច្បាស់ ឬ​មិន​ខុស​ច្បាប់ ក៏​ពួក​គាត់​នៅ​តែ​ធ្វើ​ដែរ។ អ្នក​ទៅ​រក​សេវាកម្ម នៅ​តែ​ទៅ​រក​អ៊ីចឹង។ សំខាន់​គ្រាន់​តែ​មួយ គាត់​មាន​សិទ្ធិ​ការពារ​ខ្លួន​គាត់ មួយ​មិន​មាន។ មើល​ការងារ​សំណង់​ទៅ​មើល។ ព្រោះ​តែ​ការងារ​មួយ​ស្រប​ច្បាប់ មិន​មែន​គ្រប់​គ្នា​សុទ្ធ​តែ​នាំ​គ្នា​ទៅ​ធ្វើ​ទេ។ បើ​គេ​ចង់​លក់​ភេទ ជា​រឿង​របស់​គេ។ គេ​រក​លុយ​ចិញ្ចឹម​ជីវិត​គេ។ យើង​ពេញ​ចិត្ត ឬ​មិន​ពេញ​ចិត្ត ក៏​នៅ​តែ​ជា​រឿង​គេ។

Credit: mongul.com
អ៊ីចឹង​ពេល​ដែល​អ្នក​និយាយ​មើល​ងាយ​អ្នក​លក់​ភេទ ឬ​ប្រៀប​ធៀប​ថា​ដូច​ជា «ស្រី​ខូច» ត្រូវ​ដឹង​ថា ស្រី​ខូច​ក៏​មិន​មាន​អ្វី​ខុស​ដែរ។ ការងារ​គឺ​ការងារ។ ពួក​គាត់​មិន​មាន​ទៅ​លួច​ប្លន់​អ្នក​ណា​ទេ។ (Besides, politicians fuck you up more than sex workers ever could.) ពេល​ដែល​អ្នក​ទៅ​ធ្វើការ​ក្នុង​ការិយាល័យ​ម៉ាស៊ីន​ត្រជាក់ អ្នក​ក៏​កំពុង​តែ​លក់ កាយ លក់ ពេល វេលា លក់ ខួរ ក្បាល លក់ ជំនាញ ឲ្យ គេ ដូច តែ គ្នា ទេ។

Love, Catherine
XOXO 

Related articles: 
5 reasons why legalizing prostitution protects & empowers women, Mongul 
Why it's time to legalize prostitution, The Daily Beast

No comments:

Post a Comment