ច្បាប់ចរាចរណ៍ថ្មីអាចនឹងជួយជីវិតអ្នកដំណើរ
នៅដើមឆ្នាំ២០១៦នេះ រដ្ឋាភិបាលប្រទេសខ្មែរបានចាប់ផ្តើមអនុវត្តច្បាប់ចរាចរណ៍ថ្មីដែលធ្វើឲ្យគេនាំគ្នារិះគន់ពេញ
Facebook។ ខ្ញុំចង់បញ្ជាក់ជាមុនថា
ខ្ញុំបានរកមាត្រាច្បាប់ថ្មីនោះដែរ តែរកមិនឃើញជាភាសាអង់គ្លេស អ៊ីចឹងខ្ញុំនិយាយនេះ
គឺតាមអ្វីដែលខ្ញុំបានអាន បានឃើញ និងបានជួបផ្ទាល់។ បើតាមគំនិតរបស់ខ្ញុំ
ខ្ញុំគិតថាច្បាប់ចរាចរណ៍ថ្មីនេះគឺមិនមានអ្វីខុសទេ។
 |
| Credit: khmernz.blogspot.com |
ចំណុចទីមួយដែលខ្ញុំឃើញគេរិះគន់ គឺច្បាប់ដែលចែងមកថា អ្នកបើកបរត្រូវយកកាតគ្រី
និងប័ណ្ណបើកបរដាក់តាមខ្លួនពេលដែលបើកបរ។ គេនាំគ្នានិយាយបន្ថែមថា បើអ៊ីចឹង
ម៉េចមិនឲ្យយកសំបុត្រកំណើត សំបុត្រមរណភាពតាមខ្លួនដែរទៅ។ តើមានដែលឆ្ងល់ទេថា
ហេតុអ្វីបានជាគេបង្កើតកាតគ្រីហ្នឹងមក? កាតគ្រី ឬ Registration គឺគេប្រើដើម្បីបញ្ជាក់ថា
តើអ្នកណាជាម្ចាស់របស់យានយន្តនោះ។ ហើយសួរថា ហេតុអ្វីបានជាគេចង់ឲ្យដាក់កាតស្អីគេហ្នឹងតាមខ្លួន?
ដើម្បីបញ្ជាក់ថា យានយន្តហ្នឹងជារបស់យើង ហើយយើងមិនបានលួចគេ។
បើនិយាយតាមទ្រឹស្តីវិញ នៅពេលដែលយើងបាត់យានយន្ត កាតគ្រីនេះហើយ ដែលនាំឲ្យប៉ូលីសជួយរកយានយន្តយើងមកវិញ
ពេលដែលយើងបាត់យានយន្ត ប៉ុន្តែខ្ញុំក៏យល់ដែរថា ប្រទេសខ្មែរយើងប្រហែលជាមិនមានប្រសិទ្ធិភាពដល់ថ្នាក់ហ្នឹងទេ។
ប៉ុន្តែអ្វីដែលខ្ញុំឆ្ងល់វិញ តើហេតុអ្វីបានជាមិនចង់ទៅធ្វើកាតគ្រីហ្នឹង?
ធ្វើទៅអស់លុយមែន តែវាមិនមែនអត់ប្រយោជន៍ឯណា? យ៉ាងហោចណាស់ ក៏អាចប្រើពេលបាត់សំបុត្រម៉ូតូដែរ។
ខ្លាចអស់លុយមែន? ចុះលុយដែលយើងចំណាយលើអ្វីដែលមិនចាំបាច់រាល់ថ្ងៃ រំលែកវាយកមកធ្វើបន្តិចទៅ។
អត់មានពេល? ធ្វើកាតគ្រី ត្រូវទៅចាំប៉ុន្មានខែ ប៉ុន្មានឆ្នាំ? បើធ្វើហើយ
តើយកតាមខ្លួនពិបាកប៉ុណ្ណា? បើធ្វើហើយ តែយកទៅដាក់ហិប ចាក់សោរ២០ជាន់
ធ្វើ ធ្វើអី? ខ្ញុំទម្លាប់យកអត្តសញ្ញាណប័ណ្ណ ប័ណ្ណបើកបរ កាតសមាជិក និងកាតផ្សេងៗតាមខ្លួន
ព្រោះពេលខ្លះត្រូវការប្រើ។ ម៉្យាង ក្រែងលោសន្លប់នៅកន្លែងណា មានគេស្គាល់អត្តសញ្ញាណ។
ខ្លាចបាត់? ចុះលុយដែលយកតាមខ្លួនហ្នឹង អត់ខ្លាចបាត់ទេឬ? ហើយបើខ្លាចបាត់
យកតាមខ្លួនដែរធ្វើអ្វី?
 |
| Credit: worldorphanfund.org.au |
នៅប្រទេសផ្សេង (ឧទាហរណ៍ ប្រទេសអាមេរិក) អ្នកបើកបរចាំបាច់ត្រូវយកប័ណ្ណបើកបរ
កាតគ្រី និងកាតធានារ៉ាប់រងតាមខ្លួន។ បើពេលដែលប៉ូលីសឃាត់ ហើយមិនមានប័ណ្ណបើកបរ
កាតគ្រីទេ ប៉ូលីសអាចនឹងផាកដល់រាប់រយដុល្លារ។ ប្រទេសគេ គេធ្វើយូរហើយ ហេតុអ្វីបានជាយើងមកនាំគ្នាផ្អើលដូចច្បាប់ចែងឲ្យយកជ្រូកហោះតាមខ្លួនអ៊ីចឹង?
និយាយពីប័ណ្ណបើកបរវិញ។ ខ្ញុំដឹងថា ប័ណ្ណបើកបរស្រុកខ្មែរស្រួលយកណាស់
ពេលខ្លះគ្រាន់តែបង់លុយក៏បានដែរ។ ប៉ុន្តែបើនិយាយទៅវិញ យ៉ាងហោចណាស់ ក៏គួរតែជាន់សាលាបើកបរបន្តិចដែរ។
ពេលខ្ញុំជិះតាមផ្លូវម្តងៗ ដូចផ្សងព្រេងក្នុងរឿង។ ត្រូវមើលមុខ មើលក្រោយ
មើលឆ្វេង មើលស្តាំ មើលលើ ហើយមើលក្រោមទៀត។ បើនិយាយតាមត្រង់ មនុស្សដែលជិះតាមផ្លូវភាគច្រើន
ចេះតែទាញម៉ូតូ ទាញឡាន ចេញពីផ្ទះ ជាន់ហ្គ៊ែរហើយទៅមុខទេ។ ទៅរៀនបើកបរ យកប័ណ្ណបើកបរមកដាក់តាមខ្លួនខ្លះទៅ។
បើមិនចេះបើកបរល្អណាស់ណាទេ យ៉ាងហោចណាស់ក៏បានស្គាល់សញ្ញាចរាចរណ៍ ឬច្រើនបំផុត
ក៏បានស្គាល់ភ្លើងចរាចរណ៍ដែរ។ វាមានបីពណ៌។ ហើយពេលវាចេញពណ៌ក្រហម យើងឈប់។
ទោះបីអត់មានមនុស្ស ក៏យើងឈប់ដែរ លុះត្រាណាតែយើងខ្វាក់ពណ៌។ ខ្ញុំធ្លាប់ច្រើនដងហើយ
ដែលពេលភ្លើងស្តុបពណ៌ក្រហម ផ្លូវអត់មានមនុស្ស មានតែខ្ញុំទេដែលឈប់។ គេនាំគ្នាជិះទៅអស់។
ប្រទេសយើងពូកែណាស់ ពណ៌អីក៏មើលឃើញពណ៌បៃតងដែរ។
រឿងមួយទៀត។ ខ្ញុំឃើញបងស្រីម្នាក់ គាត់និយាយថា ប៉ូលីសផាកគាត់ដោយឡានគាត់បើកបរលើសចំណុះ
មានន័យថា ឡានគាត់ត្រូវជិះខាងក្រោយបានតែ៣នាក់ទេ តែគាត់ដាក់ដល់ទៅ៤នាក់។
ប៉ូលីសផាកគាត់អស់២ម៉ឺន៥ពាន់។ មានមនុស្សជាច្រើនបានរិះគន់ថាធ្វើអ៊ីចឹងមិនសម
ទេ។ ខ្ញុំមិនដឹងថាត្រូវនិយាយយ៉ាងម៉េចមុនទេ។ សួរដល់អ្នកដែលធ្លាប់ជិះឡានវិញ។
ពេលដែលចូលក្នុងឡាន មានឃើញខ្សែពណ៌ខ្មៅនៅជាប់កៅអី ដែលមើលទៅដូចខ្សែក្រវ៉ាត់ទេ?
អាហ្នឹងគេហៅថា «ខ្សែក្រវ៉ាត់សុវត្ថិភាព»។
 |
| Credit: www.hk-phy.org |
ពេលយើងជិះឡាន យើងពាក់អាខ្សែហ្នឹងជាប់ខ្លួនទៅ វាអាចជួយជីវិតយើងបាន។
នៅក្នុងឡាន គេមានកំណត់ចំនួនខ្សែក្រវ៉ាត់នេះ ដែលមានន័យថា ចំនួនមនុស្សក្នុងឡានមិនគួរលើសពីចំនួនខ្សែក្រវ៉ាត់សុវត្ថិភាពទេ។
មានដឹងថាហេតុអីទេ? បើខ្សែក្រវ៉ាត់មានតែ៣ តែយើងដាក់មនុស្ស៤នាក់ មានន័យថាមនុស្សម្នាក់ត្រូវជិះដោយមិនពាក់ខ្សែក្រវ៉ាត់។
អ៊ីចឹងមានន័យថា បើមានករណីគ្រោះថ្នាក់ចរាចរណ៍ ឬឡានក្រឡាប់ ម្នាក់នោះហើយ ដែលមានឱកាសស្លាប់ឬរបួសច្រើនជាងគេ។ អ្នកផលិតឡាន គេវាស់វែងអស់ហើយ។ មិត្តភក្តិខ្ញុំនៅអាមេរិក
ពេលចូលជិះឡានម្តងៗ បើមិនដាក់ខ្សែក្រវ៉ាត់ទាំងអស់គ្នាទេ គេមិនព្រមបើកទេ។
ឲ្យយល់ខ្លះផង។
មិនត្រឹមតែប៉ុណ្ណឹងទេ បើមានមនុស្សលើសចំណុះ អ្នកបើកឡានអាចនឹងមើលកញ្ចក់ក្រោយ
ឬកញ្ចក់ចំហៀងមិនឃើញទេ។ ខ្ញុំមិនដឹងថាពួកគាត់បើកឡានយ៉ាងម៉េចទេ តែខ្ញុំមិនចេះបើកឡានទាំងមើលមិនឃើញជុំវិញខ្លួនទេ។
បើមើលមិនឃើញ ពេលបត់ធ្វើម៉េច? ពេលថយក្រោយធ្វើម៉េច? អ្នកខ្លះថា៖ «គ្រាន់តែជិះមួយភ្លែត
វាមិនទៅស្អីទេ»។ ខ្ញុំសួរទៅវិញ ចុះអ្នកដែលស្អីរាល់ដងហ្នឹង ពេលគេចេញពីផ្ទះ
គេមានដែលគិតថានឹងមានរឿងកើតឡើងទេ? អ្នកដែលគ្រោះថ្នាក់ចរាចរណ៍ ពេលចេញពីផ្ទះ
គាត់ដែលគិតថានឹងជួបគ្រោះថ្នាក់ចរាចរណ៍ទេ? គាត់ប្រហែលជាក៏បាននិយាយថា៖
«តែមួយភ្លែត វាគ្មានទៅស្អីទេ»។
ខ្ញុំធ្លាប់ធ្វើការជាមួយនឹងអង្គការរបស់ប្រទេសអង់គ្លេសមួយ។ ពេលដែលចេញទៅណា
ប្រសិនបើអ្នកដំណើរមិនពាក់ខ្សែក្រវ៉ាត់ អ្នកដែលត្រួតពិនិត្យគឺមិនឲ្យចេញឡានទេ។
បើឡានសម្រាប់តែមនុស្ស២០នាក់ជិះ គឺចំនួនមនុស្សក្នុងឡានត្រូវតែ២០នាក់ឬតិចជាងនេះ។
មិនមានករណីលើកលែងទេ ព្រោះវាជាជីវិតរបស់មនុស្ស។
ចំពោះអ្នកបើកបរទាំងអស់ ពេលដែលអ្នកបើកបរ តើអ្នកមានដែលគិតទេថា ជីវិតអ្នកជិះទាំងអស់កំពុងតែនៅក្នុងដៃអ្នក?
អ្នកខ្លះលើកករណីថា ចុះចំពោះអ្នកដែលមានសមាជិកច្រើនវិញ? ខ្ញុំសួរវិញថា
តើអ្នកចង់ប្រថុយជីវិតរបស់សមាជិកគ្រួសារអ្នកប៉ុណ្ណា? ដាក់មនុស្ស១០នាក់ក្នុងឡានក៏បានដែរ។
តែសួរថា ពេលដាក់ទៅ អត់មានប៉ះពាល់នឹងដំណើរការរបស់ឡាន (the car’s performance)នោះឬ? បើមានគ្រោះថ្នាក់ចរាចរណ៍
កុំភ្លេចណាថា មនុស្សទាំង១០នាក់ក្នុងឡាននោះអាចនឹងរបួស ឬស្លាប់ទាំងអស់គ្នា។
ខ្ញុំឃើញច្រើនហើយ។ ដែលលឺពាក្យថា៖ «ការពារប្រសើរជាងព្យាបាល» ទេ? យ៉ាងច្រើន
ទិញកង់ជិះទៅ។ ខ្ញុំជិះកង់រាប់ឆ្នាំហើយ មិនដែលឃើញអីផង។ អត់អស់លុយច្រើន
ហើយជួយបរិស្ថានទៀត។
 |
| Credit: tvtropes.org |
ខ្មែរយើងចូលចិត្តនិយាយថា ប្រទេសយើងហេតុអ្វីមិនរីកចម្រើនដូចគេ មិនជឿនលឿនដូចគេ?
តែពេលដែលប្រទេសចាប់យកច្បាប់ដូចប្រទេសអភិវឌ្ឍន៍ យើងនាំគ្នារិះគន់ ព្រោះយើងមិនចង់ធ្វើ
ព្រោះវាពិបាក ព្រោះយើងខ្ជិល។ ចង់ឲ្យចរាចរណ៍ល្អជាងនេះ តែម្នាក់ៗមិនព្រមធ្វើអ្វីទេ។
នៅតែប្រកាន់ទម្លាប់ដដែល។ Einstein
និយាយថា៖
«ភាពល្ងីល្ងើគឺធ្វើអ្វីដដែលៗ តែរំពឹងទុកថាលទ្ធផលនឹងកែប្រែ»។ ច្បាប់ថ្មីនេះ
អាចឬមិនអាចជួយចរាចរណ៍យើង ប៉ុន្តែបើយើងនៅតែប្រកាន់ទម្លាប់ដូចពីមុន យើងគិតថាចរាចរណ៍នឹងកែម៉េច?
ត្រូវចាំថា យើងក៏ជាអ្នករួមចំណែកមួយដែរ។ អ្នកជិះនៅលើផ្លូវមានតែពួកយើងហ្នឹង។
ខ្ញុំទទួលស្គាល់ថា ខ្ញុំមិនមែនឥតខ្ចោះទេ។ ពេលខ្លះក៏ខ្ញុំបើកឡានលើសចំណុះដែរ
តែបើប៉ូលីសចាប់ ខ្ញុំក៏ដឹងដែរថា ខុសមកពីខ្ញុំ។ ខ្ញុំមិនអាចទៅបន្ទោសប៉ូលីសកើតទេ។
ប៉ុន្តែបើបកមកវិញ ខ្ញុំក៏ដឹងដែរថា ការផាកពិន័យនេះ អាចនឹងថ្លៃពេកសម្រាប់ប្រជាពលរដ្ឋមួយចំនួន
ហើយលុយដែលបានមកនោះ ក៏ប្រហែលជាមិនបានយកមកជួយជាតិច្រើនណាស់ណាដែរ។ ប្រទេស
Third World Country ដូចយើង ជួបផលលំបាកអ៊ីចឹងហើយ។
តែអ្វីដែលខ្ញុំចង់និយាយ គឺឲ្យធ្វើតាមច្បាប់នោះទៅ វាមិនខាតទេ វាអាចជួយជីវិតយើងទៀត។
តែបើយើងគោរពគ្រប់ចំណុចហើយ ប៉ូលីសនៅតែមានលេសមកផាកពិន័យទៀត រឿងនោះចាំយើងនិយាយពេលក្រោយទៀត។
Reference:
Comments
Post a Comment