មនុស្សស្រីស្លៀកពាក់បែបណាបានសង្គមឈប់រិះគន់ឲ្យ?
ឲ្យតែខ្ញុំចូលទៅមើល Facebook
ពេលណា
ដឹងតែមានរឿងត្រូវហួសចិត្តរហូត។ កាលពីថ្ងៃពុធនេះ មិត្តភក្តិខ្ញុំបាន
Tag ខ្ញុំចូលក្នុងរូបរបស់នារីម្នាក់ដែលគាត់ពាក់អាវវាលខ្នង
និងខោខ្លី ដែលបងប្រុសម្នាក់គាត់បាន Post
ហើយគាត់បាននិយាយថា
សម្លៀកបំពាក់នារីម្នាក់នោះគឺបំផ្លាញប្រពៃណីខ្មែរ ហើយថែមទាំងប្រៀបធៀបគាត់នឹងស្រីបារទៀត។
គិតទៅខ្មែយើង ឲ្យតែគេធ្វើអ្វីដែលយើងមិនពេញចិត្ត គឺដឹងតែបំផ្លាញប្រពៃណីតែម្តង។
គួរតែមានពាក្យរិះគន់ថ្មីហើយ។
តែថ្ងៃនេះ ខ្ញុំមិនមែនចង់និយាយរឿងហ្នឹងទេ។ ខ្ញុំចង់និយាយពីរឿងសម្លៀកបំពាក់របស់មនុស្សស្រី។
ចាំខ្ញុំនិយាយរឿងប្រពៃណីចុងក្រោយគេចុះ ប៉ុន្តែមនុស្សមួយចំនួន ខ្ញុំឧស្សាហ៍លឺគេថា
មនុស្សស្រីស្លៀកពាក់ខ្លីគឺចង់ឲ្យគេមើល ចង់បង្អួតសម្រស់។ ខ្ញុំជាមនុស្សម្នាក់ដែលចូលចិត្តស្លៀកខោខ្លី
អាវវាល។ ហើយរាល់ពេលដែលខ្ញុំបើកទូរើសខោអាវមកពាក់ ខ្ញុំមិនដែលគិតទេថា៖
«តើថ្ងៃនេះ ខ្ញុំគួរតែស្លៀកពាក់ម៉េចដើម្បីឲ្យគេមើល?» ខ្ញុំស្លៀកពាក់អ្វីដែលខ្ញុំចូលចិត្ត
អ្វីដែលធ្វើឲ្យខ្ញុំស្រួលក្នុងខ្លួន (Comfortable,
in case you’re having a dirty mind here)។ បើអ្នកធ្លាប់ចេញទៅក្រៅពេលថ្ងៃ
អ្នកច្បាស់ជាដឹងហើយថាស្រុកខ្មែរយើងក្តៅប៉ុណ្ណា។ ខ្ញុំស្លៀកខ្លី ព្រោះវាមិនសូវក្តៅ។
ខ្ញុំមិនដឹងថាអ្នកដទៃគេយ៉ាងម៉េចទេ ប៉ុន្តែពេលខ្ញុំទៅរៀន ឬធ្វើការ ខ្ញុំអត់ចូលចិត្តអង្គុយទាំងស្អិតញើសពេញខ្លួនដោយសារតែខ្ញុំស្លៀកខោវែង
អាវ៤ ឬ៥ជាន់ដោយសារតែខ្លាចអ្នកដទៃរិះគន់ឲ្យនោះទេ។ ហើយម៉្យាង ខ្ញុំចូលចិត្តជិះកង់ទៀត។
ខ្ញុំអត់ចង់ហប់ខ្យល់ស្លាប់ទេ។
មនុស្ស និងសត្វគឺដូចគ្នាទេ។ ធម្មជាតិ (Instinct) របស់យើងគឺចង់ទាក់ទាញភេទផ្ទុយគ្នា ប៉ុន្តែសម្រាប់សត្វ
ភាគច្រើនសត្វឈ្មោលជាអ្នកទាកទាញ់សត្វញី។ អ៊ីចឹងហើយបានជាសត្វឈ្មោលភាគច្រើនមានរោម
ពណ៌ស្រស់ជាង ឬយំបានលឺជាង ដូចជាក្ងោក ឬត្រីជាដើម។ ក្ងោកឈ្មោលត្រដាងរោមនៅមុខក្ងោកញីដើម្បីទាក់ទាញក្ងោកញី។
មនុស្សយើងក៏ដូចគ្នាដែរ។ ទោះបីជាយើងមិនចាប់អារម្មណ៍ (or consciously aware) ក៏ដោយ ប៉ុន្តែគោលបំណងសំខាន់ក្នុងជីវិតមនុស្ស
និងសត្វគឺដើម្បីបន្តពូជ។ អ្វីដែលខុសគ្នានោះគឺសម្រាប់មនុស្ស ភេទញី ឬស្រីជាអ្នកទាក់ទាញភេទប្រុស
ឬឈ្មោល។ ហេតុនេះហើយបានជាមនុស្សស្រីមានលក្ខណៈទន់ (Soft, Curves) ចង្កេះ ត្រគាក និងសុដន់ដែលទាក់ទាញមនុស្សប្រុស។
វាជាអ្វីដែលធម្មជាតិបង្កើតមក។
ការដែលចង់ទាក់ទាញភេទផ្ទុយគ្នា គឺជាធម្មជាតិរបស់មនុស្ស ប៉ុន្តែមិនមែនមនុស្សស្រីទាំងអស់
ជាពិសេសអ្នកស្លៀកពាក់ «sexy» គឺសុទ្ធតែរស់ដើម្បីទទួលបានចំណាប់អារម្មណ៍ពីមនុស្សប្រុសទេ។
ពេលខ្លះ ខ្ញុំចង់ស្លៀកពាក់ឲ្យស្អាត ព្រោះខ្ញុំស្រឡាញ់រូបរាងរបស់ខ្ញុំ ព្រោះខ្ញុំក្មេងបានតែម្តងទេ។
ខ្ញុំធ្វើនេះ គឺដើម្បីខ្ញុំខ្លួនឯងផ្ទាល់។ បើខ្ញុំខ្លួនឯងមិនស្រឡាញ់រូបរាងខ្លួនឯងផង
តើអ្នកដទៃគេស្រឡាញ់ចូលចិត្តដោយរបៀបណា?
អ្វីដែលខ្ញុំស្អប់ជាងគេ គឺពេលដែលគេនិយាយថា ខ្ញុំស្លៀកពាក់បែបនេះ
សមនឹងឲ្យគេស្រែកញ៉ែតាមផ្លូវ ឬមនុស្សស្រីខ្លះសមនឹងគេរំលោភព្រោះតែស្លៀកពាក់«មិនសមរម្យ»។
ខ្ញុំចង់សួរទៅវិញថា អ្វីដែលខ្ញុំស្លៀកពាក់ គឺនៅលើខ្លួនខ្ញុំទេ តែបើអ្នកមិនអាចគ្រប់គ្រងពងស្វាស
និងលិង្គរបស់អ្នកបាន តើហេតុអ្វីបានជាខុសមនុស្សស្រីទៅវិញខ្ញុំទៅវិញ?
«លោកប៉ូលីស ខ្ញុំចាប់រំលោភម្នាក់ស្រីហ្នឹង ព្រោះពេលឃើញម្នាក់ស្រីហ្នឹង លិង្គខ្ញុំឡើងរឹង
ហើយខ្ញុំអត់ដឹងធ្វើម៉េច ក៏ចាប់រំលោភទៅ»។ ចុះបើគេនិយាយថា អ្នកសមនឹងត្រូវតែចោរប្លន់
ព្រោះអ្នកដាក់លុយតាមខ្លួន ឬមកពីអ្នកជិះម៉ូតូ។ បើដើរ ហើយអត់មានលុយក្នុងកាបូប
ក៏គេមិនប្លន់ដែរ។ តើមូលហេតុនោះវិញ យ៉ាងម៉េចដែរ? ឬមកពីខ្ញុំជាមនុស្សស្រី
ដូច្នេះខ្ញុំត្រូវតែនៅក្រោមគំនាបរបស់សង្គម?
 |
| Credit: cambodiannation.wordpress.com |
ឥឡូវសូមលូកចូលរឿងវប្បធម៌ប្រពៃណីនេះបន្តិច។ វប្បធម៌គឺកើតមកពីទម្លាប់។
ពេលមនុស្សទម្លាប់ធ្វើអ្វីមួយរាប់រយឆ្នាំទៅ វាក៏កើតទៅជាវប្បធម៌ មានន័យថា
វប្បធម៌គឺមនុស្សជាអ្នកបង្កើត។ វប្បធម៌គឺផ្លាស់ប្តូរ តាមសម័យកាល។ ពេលដែលផ្នែកណាមួយនៃវប្បធម៌នោះលែងបម្រើដល់តម្រូវការរបស់មនុស្ស
វានឹងសាបរលប់ ដូចជាការចូលម្លប់ជាដើម។ បើយើងបកចូលទៅកំឡុងឆ្នាំ ៦៨ ទៅ
៥៥០ គឺសម័យហ្វូណន ស្រ្តីខ្មែរយើងគឺស្លៀកសារ៉ុង សំពត់ ឬសំពត់សារ៉ាបាប់ ប៉ុន្តែមិនមានពាក់អ្វីនៅល្វែងខាងលើទេ។
នៅសតវត្សទី១៦ លោក ជី តាខ្វាន់ បានធ្វើដំណើរមកប្រទេសកម្ពុជា ហើយធ្វើកំណត់ត្រាមួយចំនួនពីរបៀបរបបរស់នៅរបស់ប្រជាជនខ្មែរ។
ក្នុងនោះ លោកបានសម្គាល់ឃើញថា នារីខ្មែរពេលនោះ គឺមិនពាក់អាវទេ។ គេព្រលែងសុដន់ទទេរ
រាប់ទាំងអគ្គមហេសីរបស់ព្រះមហាក្សត្រទៀត។ បើអ្នកគិតថា កំណត់ត្រានេះមិនពិត
អ៊ីចឹងម៉េចគេចាំបាច់ឲ្យសិស្សរៀនក្នុងសាលាធ្វើអី?
ខ្ញុំគ្រាន់តែចង់និយាយថា វប្បធម៌ខ្មែរយើង គឺមានផ្លាស់ប្តូរច្រើនលើក
ច្រើនសារ មកហើយ។ តើអ្នកណាជាអ្នកសម្រេចថា វប្បធម៌មួយណាដែលត្រូវធ្វើតាម?
លោក ជី តាខ្វាន់ បានធ្វើដំណើរមកក្នុងសម័យអង្គរ ដែលជាសម័យមួយរុងរឿងរបស់ខ្មែរយើង។
តើវប្បធម៌ពេលនោះមិនមានតម្លៃទេឬ? ចុះអ្វីៗថ្មីដែលយើងកំពុងតែទទួលយកនេះ
តើវាមិនបំផ្លាញវប្បធម៌ទេ? បើស្លៀកពាក់ខោអាវខ្លីខុសប្រពៃណី ចុះអាវយឺត
និងខោខូវប៊យជាប្រពៃណីយើងដែរ មែនទេ? តើអ្នកណាជាអ្នកសម្រេចថា តើអ្វីដែលត្រូវ
អ្វីដែលខុស?
ពួកយើងមិនមែនជាហ្វូងចៀមទេ។ គេថា យើងមិនគួរធ្វើរឿងមួយនេះ ប៉ុន្តែយើងមានដែលគិតពីហេតុផលវាទេ?
គេនាំគ្នានិយាយថា៖ «មកពីវប្បធម៌វាអ៊ីចឹង»។ តែហេតុអ្វីបានវាវប្បធម៌គេកំណត់មកអ៊ីចឹង?
ហើយវាមានផ្តល់ប្រយោជន៍ដល់ការរស់នៅប្រចាំថ្ងៃរបស់យើងដែរឬអត់? បើអត់ទេ
នៅឱបក្រសោបវាដល់ណា?
នៅប្រទេសជាង២៨នៅទ្វីបអាព្រិច និងទ្វីបអាស៊ី គេមានប្រកាន់ខ្ជាប់ទំនៀមទម្លាប់កាត់ចុងប្រដាប់ភេទមនុស្សស្រី។
ហើយជារៀងរាល់ឆ្នាំ មានក្មេងស្រីជាច្រើនដែលស្លាប់ ដោយសារតែទំនៀមទម្លាប់នេះ។
ខ្ញុំដឹងថា រឿងនេះ គឺធ្ងន់ធ្ងរជាង ប៉ុន្តែចំណុចដែលខ្ញុំចង់ផ្តោតនោះគឺ
មិនមែនវប្បធម៌ ទំនៀមទម្លាប់គឺសុទ្ធតែត្រូវទាំងអស់ទេ។
 |
| Credit: devata.org |
ខ្ញុំនិយាយនេះ មិនមែនចង់ឲ្យមនុស្សស្រីលែងស្លៀកសម្លៀកបំពាក់ ដើរដោះអាវ
ឬឲ្យយើងទាំងអស់គ្នាបោះបង់ចោលវប្បធម៌ទេ។ ប៉ុន្តែគួរតែចេះឆ្ងល់ ចេះគិតពីហេតុផលផង។
មូលហេតុដែលមនុស្សស្រីត្រូវបានគាបសង្កត់គឺកើតមានឡើងតាំងពីរាប់ពាន់ឆ្នាំមុន
ហើយខ្ញុំក៏មិនអាចបកស្រាយពីវាបានដែរ ព្រោះវាជារឿងវែងឆ្ងាយមួយទៀត។
គេថា មនុស្សស្រីបើឲ្យគេឃើញរាងកាយអស់ទៅ លែងមានតម្លៃហើយ។ ចុះម៉េចបានជាមនុស្សប្រុសមិនអ៊ីចឹងដែរទៅ?
ខ្ញុំធ្លាប់ឃើញគេនិយាយប្រៀបធៀបមនុស្សស្រីនឹងពេជ្យដែលកប់ក្នុងដីទៀត។
ខ្ញុំជាមនុស្ស មិនមែនពេជ្យ មិនមែនវត្ថុសម្រាប់ឲ្យគេដេញថ្លៃទេ។ ត្រូវចាំថា
តម្លៃគឺខ្លួនឯងជាអ្នកកំណត់។ បើខ្លួនយើងមិនឲ្យតម្លៃខ្លួនយើងផង តើឲ្យគេឲ្យតម្លៃយើងយ៉ាងណា?
ប្រសិនបើមិនចូលចិត្តឃើញមនុស្សស្រីស្លៀកពាក់«ខើច»ខ្លីទេ យើងបែរមុខចេញទៅ
គឺលែងឃើញហើយ។ គេស្លៀកពាក់លើខ្លួនគេ យើងមិនចាំបាច់ចូលចិត្តទេ។ តែពាក្យសម្តីជេរស្តី
ឬលួចថតរូបគេមកដាក់ផ្សាយនេះ គឺធ្វើឲ្យប៉ះពាល់ដល់គេ។ សូមផ្តល់សិទ្ធិសេរីភាព
ហើយគោរពការសម្រេចចិត្តរបស់អ្នកដទៃផង។ បើគេចង់ស្លៀកហូល ឬរ៉ូប ឬប៊ីគីនី
គឺគេស្លៀកលើខ្លួនគេ ហើយគេក៏មិនបង្ខំឲ្យយើងមើលដែរ។ បើមិនចូលចិត្ត យើងអាចបែរមុខចេញ។
បើមិនចូលចិត្ត កុំស្លៀកពាក់បែបនោះទៅ តែកុំប្រើពាក្យសម្តីមកធ្វើឲ្យប៉ះពាល់អារម្មណ៍
ឬរិះគន់ ជេរស្តីគេព្រោះតែយើងមិនពេញចិត្តនឹងជម្រើសរបស់គេ។
Love, Catherine
XOXO
 |
| Credit: cogxio.tumblr.com |
http://www.rfa.org/khmer/indepth/chinese_in_cambodia_part1-02032011225642.html
http://www.iexplore.com/travel-guides/south-and-southeast-asia/cambodia/history-and-culture
http://www.rasmeinews.com/local_news/detail?class=local&news=OTMxODFkMD&page=18
https://en.wikipedia.org/wiki/Khmer_clothing#Chang_Pong
http://www.bustle.com/articles/83035-7-reasons-to-stop-shaming-women-who-wear-revealing-clothing-your-ideas-of-propriety-aside
http://animals.mom.me/peacocks-spread-feathers-2729.html
អត្ថបទល្អ គួរអោយកោតសរសើរ តែបង្កប់នូវគំនិតអត្មានិយម។ វាស្តែងតាមរយៈឃ្លាចុងក្រោយ "កុំប្រើពាក្យសម្តីមកធ្វើឲ្យប៉ះពាល់អារម្មណ៍" និងឃ្លាមុន "អ្វីដែលខ្ញុំស្លៀកពាក់ គឺនៅលើខ្លួនខ្ញុំទេ តែបើអ្នកមិនអាចគ្រប់គ្រងពងស្វាស និងលិង្គរបស់អ្នកបាន"។ បើអ្នកស្លៀកពាក់មិនសមរម្យនៅទីសាធារណៈដោយមិនរអែងភ្នែកញាតិផង តើហេតុអ្វីចាំបាច់ហាមឃាត់គេមិនអោយរិះគន់ ម្តេចមិនចេះគ្រប់គ្រងប្រដាប់ គិត របស់ខ្លួនកុំអោយខឹងផងទៅ។ ពិតជាអត្មានិយមណាស់ !
ReplyDelete