នគរបាលបានប្រាប់ពួកខ្ញុំថាការបណ្តើរឆ្កែជាក្រុមខុសច្បាប់នៅប្រទេសកម្ពុជា

We were excited to go, not knowing what awaited us

រសៀលថ្ងៃទី ៥​ ខែ មេសា នេះ មិត្តភក្តិខ្ញុំប៉ុន្មាននាក់បានរៀបចំកម្មវិធី "Say No To Dog Meat" ដែលជាកម្មវិធីដើម្បីបញ្ឈប់ការញ៉ាំសាច់សត្វឆ្កែ និងឆ្មា។

ប្រទេសកម្ពុជាជាប្រទេសមួយដែលនិយមញ៉ាំសាច់សត្វឆ្កែ និងឆ្មា។ ខ្ញុំធ្លាប់ឃើញកន្លែងលក់សាច់ឆ្កែមានតាំងក្បាលឆ្កែហើយក៏ធ្លាប់លឺគេលួចចាប់សត្វឆ្កែ និងអូសឲ្យគ្នាស្រែកតាមផ្លូវដែរ។ ដោយសារតែខ្ញុំជាអ្នកស្រលាញ់សត្វ ខ្ញុំក៏បានចូលរួមជាមួយសង្សារខ្ញុំ។ យើងយកកូនឆ្កែ Joey ទៅជាមួយដើម្បីទៅលេងជាមួយឆ្កែផ្សេង។ Joey គ្រាន់តែឡើងលើ Tuk Tuk ក៏សប្បាយចិត្តដែរ។

We knew something wasn't right

គ្រាន់តែដើរដល់សួន យើងបានឃើញមនុស្សមួយក្រុម ហើយមានប៉ូលីសព័ទ្ធជុំវិញមនុស្សមួយក្រុមនោះ។ សង្សារខ្ញុំគ្រាន់តែឃើញក៏ថា ប៉ូលីសច្បាស់ជាចាប់មិនឲ្យធ្វើហើយ ព្រោះប្រទេសកម្ពុជានេះធ្លាប់បានហាមឃាត់ការបាតុកម្មប៉ុន្មានដងហើយ។ ខ្ញុំធ្លាប់ឃើញវីដេអូហាមឃាត់បាតុកម្មព្រៃអារែង ដែលបាតុករនោះគ្រាន់តែលាបខ្លួនពណ៌បៃតង ក៏នគរបាលថាខុសច្បាប់ដែរ។ ដល់ថ្នាក់ប៉ុន្មានខែមុន មានច្បាប់ហាមឃាត់មិនឲ្យមនុស្សលើសពី១០នាក់ប្រមូលផ្តុំគ្នាទៀត។

ពេលដែលពួកខ្ញុំដើរទៅដល់ ឃើញសកម្មភាពរញ៉េរញ៉ៃ ខ្ញុំឃើញមិត្តភក្តិខ្ញុំ ក៏សួរថាមានរឿងអី បានជារញ៉េរញ៉ៃអញ្ចឹង។ មិត្តភក្តិខ្ញុំថា ក្រុមនគរបាលមិនអនុញ្ញាតឲ្យធ្វើកម្មវិធីនេះទេ។ ក្រុមនគរបាលទាំងនោះថែមទាំងស្រែកដេញពួកខ្ញុំឲ្យចេញពីសួនទៀត។ អ្នកចូលរួមមួយចំនួនធំក៏ជនបរទេស។ ពួកគាត់ឈរមើលមុខគ្នា មិនដឹងថាហេតុអ្វីបានក្រុមនគរបាលនោះស្រែកឲ្យពួកយើងទេ។

Confusion filled the air

Some people felt threatened, so they started leaving

ពេលដែលមិត្តភក្តិខ្ញុំដែលរៀបចំកម្មវិធីនោះបានពន្យល់បកស្រាយទៅក្រុមនគរបាលនោះ ពួកគាត់យកលេសថា មិនឲ្យធ្វើទេ ព្រោះខ្លាចឆ្កែបន្ទោរបង់នៅក្នុងសួន។ ពេលពួកខ្ញុំបង្ហាញថង់ដែលប្រើសម្រាប់រើសលាមក ក្រុមនគរបាលនោះបែរជាស្រែកឲ្យពួកយើងចេញពីសួន។ មិត្តភក្តិខ្ញុំដែលបានទៅដល់សួនមុនខ្ញុំបានប្រាប់ខ្ញុំថា ក្រុមនគរបាលបាននិយាយថា "គ្មានច្បាប់ណាដែលឲ្យជួបជុំគ្នាបណ្តើរឆ្កែក្នុងសួនទេ។"

ប៉ូលីសនគរបាលមួយថែមទាំងសំឡឹងមុខមិត្តខ្ញុំ ហើយនិយាយថា "ឆ្កែហ្នឹង ធាក់តែមួយជើងងាប់ហើយ។" ក្រុមនគរបាលខ្លះចេះតែស្រែកដេញពួកយើងចេញពីសួន។ ពួកខ្ញុំគ្រាន់តែនៅនិយាយអ្វីក៏ពួកគាត់មិនស្តាប់ដែរ។ គ្រាន់តែសត្វឆ្កែដែលចូលរួមក៏ភ័យខ្លាចដែរ។

Police officers telling us to get off the public park

ដោយសារតែរឿងដែលមិនគួរឲ្យជឿនេះកើតឡើង ពួកយើងសម្រេចថាឈប់ហើយទៅផ្ទះ។ គ្រាន់តែឈរនៅចញ្ចើមថ្នល់រង់ចាំឆ្លងថ្នល់ នគរបាលដែលពាក់មួកសុវត្ថិភាពពណ៌សខាងក្រោមនេះ ស្រែកដេញពួកខ្ញុំថា "កុំបណ្តើរឆ្កែនៅហ្នឹង។ បើចង់បណ្តើរ ទៅបណ្តើរកណ្តាលថ្នល់ទៅ។" បើផ្លូវសុទ្ធតែឡានម៉ូតូ តើពួកគាត់ចង់ប្រាប់ប្រជាជនដែលពួកគាតមានភារកិច្ចការពារនោះទៅឲ្យឡានបុកស្លាប់ឬ?

Innocent bystander was told that she wasn't allowed to walk her dog

I had to cross the road for fear that they would take my camera

និយាយតាមត្រង់ទៅ ខ្ញុំខឹងឡើងញរខ្លួន។ គ្រាន់តែបណ្តើរឆ្កែជាក្រុមខុសត្រង់ណា? ពួកយើងមិនទាំងធ្វើកម្មវិធីអ្វីទាក់ទងនឹងនយោបាលផងហ្នឹង? គ្រាន់តែចង់បញ្ឃប់ការញ៉ាំសាច់សត្វឆ្កែនិងឆ្មា តើមានអ្វីខុស? ពួកគាតខ្លាចអ្វីបានជាមិនឲ្យធ្វើ? ក្រែងសួនច្បារនោះជាសួនច្បារសាធារណៈដែលប្រើលុយបង់ពន្ធបានពីប្រជាពលរដ្ឋមកធ្វើ មែនទេ? ខ្ញុំចង់បញ្ជាក់ថា នគរបាលនោះខ្លះមានកាំភ្លើងទៀត? យកកាំភ្លើងមកគំរាមដើម្បីអ្វី? ពួកគាត់ប្រាប់ថា គ្មានដែលមានច្បាប់ណាឲ្យបណ្តើរឆ្កែក្នុងសួនទេ។ ច្បាប់មួយណា? 

សូម្បីតែប្រទេសរៀតណាម និងប្រទេសចិនដែលជាប្រទេសកុំម្មុយនីសក៏ធ្វើកម្មវិធីនេះបានសម្រេចដែរ។ ចុះប្រទេសកម្ពុជាវិញ? ប្រជាធិបតេយ្យឬយ៉ាងណាវិញ? តើប្រជាជនទាំងអស់ត្រូវតែរស់នៅក្រោមគំនាប់របស់ច្បាប់ដែលក្រុមអាជ្ញាធរចេះតែបង្កើតនោះឬ? គ្រាន់តែបណ្តើរឆ្កែក៏ខុសច្បាប់ដែរ មានតែនៅដេកផ្ទះរហូតបានមិនខុសច្បាប់។